Spýggjan

Í handkeypi á apotekinum fæst ávikavist pulvur (Revolyt® - børn ≥ 2 ár) og brúsitablettir (Resorb® – børn ≥ 3 ár) at loysa upp í vatni. Í hesum evnum eru sukur og salt, og tað skal loysast upp í kókaðum, kólnaðum vatni. Handkeypsheilivágur eigur ikki at blandast við saft, mjólk ella djús.

Foreldur skulu altíð vaska sær um hendurnar eftir at hava røkt barnið, so at tálmað verður, at tey verða smittað, ella so at tey ikki bera smittuna víðari. Barnsins hendur skulu eisini vaskast.

Foreldur kunnu eisini nýta sóttreinsandi evni til hendurnar, so sum hondspritt.

Størsti ampi av spýggju og leysum lívi er vætutrot (dehydrering). Vætutrot stendst av, at meira væta fer úr kroppinum enn inn í kroppin. Børn kunnu skjótari tróta vætu enn vaksin, serliga um tey eisini hava fepur.

Hetta kann bøtast við, at barnið drekkur nógv vatn, saft, sodavatn ella annað. Gagnligt er, at tað, ið drukkið verður, inniheldur bæði salt og kaloriur, serliga um matarlysturin er ringur, tí at so fær barnið orku, og tað verður ikki dehydrerað. Tá ið barnið aftur fer at drekka, er týdningarmikið at byrja í smáum, so at barnið ikki spýr alt uppaftur.

Gev ikki barninum mjólk í byrjanini, uttan so at barnið fær bróst. Um barnið fer at spýggja av bróstamjólk, skalt tú seta teg í samband við lækna. Men gev gætur, at klíggja og at spýggja er ikki tað sama. At nýføðingar klíggja er vanligt.