Medisinskt kannabis

Medisinskt kannabis er ikki góðkent sum heilivágur, men síðan apríl 2019 hevur tað verið møguligt hjá læknum at úskriva medisinskt kannabis í Føroyum. Í Danmark var royndarætlan sett í verk í januar 2018, har loyvi varð givið at útskriva medisinskt kannabis í eitt 4-ára tíðarskeið, og Føroyar hava síðani apríl 2019 verið ein partur av tí donsku royndarætlanini.

Í slíkari royndarætlan verða ikki sett somu krøv til framleiðsluna. Hetta eru m.a. krøv innan góðsku, trygd og virkna. Øll framleiðsla skal tó vera undir eftirliti og standardiserað. Av tí at somu krøv ikki verða sett, so er vitanin um møguligar váðar við viðgerðini meira avmarkaður, enn vitanin er um góðkendan heilivág. Tað verður mælt til, at góðkendur marknaðurførdur heilivágur altíð skal vera royndur, áðrenn viðgerð verður byrjað við medisinskum kannabis. 

Av tí, at vitanin innan viðgerð við medisinskum kannabis er avmarkað, so er eisini herd frágreiðingarskylda, um ein upplivir hjáárin í samband við viðgerðina.

Landsapotekarin og Landslæknin hava í felag gjørt eina vegleiðing um nýtslu av medisinskum kannabis í Føroyum. Vegleiðingin sæst niðast á síðuni.